La belëza dl paesaje naturel y culturel de Südtirol ne n'ie nia n cajo. L ie l resultat de seculi de cura, de tradizions vivudes y de n manejamënt respetëus de ressorses limitedes. Tl proscimo var dla campania RESPECT mët la Provinzia de Bulsan śën l’arpejon naturela y culturela dl Südtirol tl zënter. 

L'arpejon mundiela UNESCO Dolomites, l'egazion tradiziunela, la transumanza coche arpejon culturela nia materiela dl UNESCO, i truep raions de scunanza – duc chisc elemënc conta de na cuntreda mudeleda y mantenida tres generazions. Tl medemo mumënt iel n habitat per tieres y plantes y n luech de paussa per la jënt da tlo y per i ghesć.

La campania lascia udëi cie che ne vën suvënz nia aprijà assé.: per l mantenimënt de chësta cuntreda unica iel de bujën de persones, respunsabltà y regules tleres. Cun messajes coche “Tlo sons ie a cësa” o “Nëus se spartion n troi” nvieia la campania a viver la natura y l paesaje cun cuscienza y respet. 

Ajache respet uel dì scialdi deplù che scunanza. Respeté la cuntreda naturela y culturela uel dì la ntënder coche arpejon coletiva y sëurantò respunsabltà per si mantenimënt, ncuei y per la generazions che vën do.