N domesdì tla Gelateria Brivido. Walter Job ie ncuei do l banch, nce sce l ie si di liede, a njenië ca n café per nëus. Da passa 35 ani incà mëina ël la gelateria deberieda cun si partner de lëur Graziano. Ël cunësc si tlienc, si preferënzes, i saluda for a na maniera da ulëi bon, restan daniëura calm y da pazienza.

"Per nëus ne n'ie l respet nia zeche de particuler, ma zeche che vivon uni di."

Seniëur Job, Vo dijëis che l respet ie per Vo zeche de pitl y da uni di. Cie ulëis'a dì cun chël?
Walter Job: "La jënt vën da nëus per passé n bel mumënt, la vën per n dlacin, na tëurta o na bela ciaculeda. L sona scëmpl, ma te chisc mumënc iel truepa belëza - y nce respunsabltà. Per mé uel l respet dì mëter a verda y nia reagì a na maniera despazienta, dantaldut tla situazions de stress."

Iel pa situazions te chëles che te rëndes cont tan mpurtanc che chisc pitli gesć possa vester?
"O sci", dij ël y s'la rij. "Per ejëmpl, canche zachei ie al telefon ntan apusté y ne savon nia sce la persona rejona cun nëus o cun zachei al telefon. Chëla ie na situazion de cunfujion. O canche i mutons sauta ncantëur sun i banc y i genitores ne n'ie nia segures de cie che i dëssa fé. Trueps ne se tol nia la bria de dì zeche per la tëma che se dessenon. L ne se trata nia de bruntlé, ma de mustré cherianza. Per mé ie chël respet."

Cie ie pa mpurtant per na bona cunlaurazion tl team?
Te nosc team sons mi cunlauradëur Graziano y ie, leprò mo doi cunlauradëures che ie bele da giut incà da nëus. Tulon truepa dezijions deberieda. Y rujenon for a na maniera davierta sce zeche ne va nia bën. Respet ie per mé nce de nia ne cundané fai. Fai possa suzeder, l ie mpurtant rujené de chisc y de abiné soluzions deberieda.

Y sce zachei devënta despazient o da ulëi mel?
Ntëur l 80% di tlienc ie families cun mutons."I mutons ie al didancuei scialdi plu segures de sé nstësc", dij Walter." Ëi sà avisa cie che i uel y chël ne ie nia zeche de stlet."
Sce zachei ie da ulëi mel, pona chier de regula Graziano o ël nstës la cunversazion. "Suvënz tleca n tonn calm, n rì o mpue de cumprenscion per mudé la situazion. La maniera coche n dij zeche, fej belau duta la defrënza."
N dlacin tumà sun fonz? Pona giaten n nuef debant.
"Chësc ne n'ie nia n drama. La jënt dëssa vester cuntënta canche la se n va dala gelateria."

(kt/tk, 03.12.2025)