Vint mutans danter set y ot ani se alenea sun l ciamp de juech al palé te Gherdëina. Les fej pert dla scuadra U8 dl FC Gherdëina, che tol chëst ann per l prim iede pert a la partides, dantaldut contra mutons, pervia dla mancianza de scuadres de mutans. 

Nce si trainadëura Giuana Prugger (33) ie dl post, si pascion per chësc sport à bele scumencià canche la ova ot ani. Si cariera dl juech al palé la à meneda dal FC Vahrn al FC Bayern nchin ti USA. Do avëi studià sport iela inò unida de reviers y à sëurantëut na scuadra de mutons te Gherdëina. “N valguna persones fova scetiches tl prim. Do n 0:16 ai dit: Ciuldì alenea pa n’ëila mi mut?” Ma l ie tosc unit a lum che si alenamënt pudova tenì pea cun chël de si coleghes ëi; la à menà la scuadra cun suzes per passa cin’ani. 

L respet tl’interazion da uni di ie de gran mpurtanza per ëila: ”Uniun dëssa avëi la medema pusciblteies; uni cumëmber dla scuadra à l mesun de jughé unfat giut. Ie ne tolereie nia dé gaujes - n vënc y n pierd deberieda.” Ëila critichea nce la cundizions nia valives per ëiles y ëi tl medemo sport: “La scuadra dla mutans giapa suvënz l trainadëur che fossa scenó jit a cësa a mans uetes, ciamps manco biei y orars de training ncompri.” 

Si dejidere: pusciblteies valives per duc tl sport y tl lëur. “Nëus son sun la drëta streda, ma ëiles y ëi muessa se sustenì un cun l auter. Mé canche duc vën tratei a na maniera valiva possen crië n ambient de respet.”