Seniëura Brugger, co vivëis'a Vo la vita da uni di coche sciafera de curiera?
Renate Brugger : Mi lëur ie uni di autramënter y se damanda truepa cunzentrazion. N à la respunsabltà per i passajieres, per l trafich sun streda y per tenì ite i orars de viac. Propi tl trafich de Maran muessen tenì cont de truepa cosses tl medemo mumënt. Furné cun la curiera ne uel nia mé dì avisé, ma nce pensé do, se urganisé y mantenì la gheneda nce ti mumënc de stress. Purempò iel n mestier scialdi bel. Nëus lauron te Südtirol, te na cuntreda che trueps cunësc scenó mé ntan la feries. Plu da giut furnovi suvënz sun cantieres, chël fova dut auter che bel. Al didancuei furnei dantaldut te zità i ti raions inter - urbans, iló iel uni di de biei mumënc.

La maniera de interazion cun la jënt ie de gran mpurtanza. Cie uel pa chësc dì per Vo?
Na gran pert de mi lëur ie l cuntat cun i passajieres. Trueps cunësci da ani incà, n se saluda, n se barata n valguna paroles. Chësc toca leprò pra mi mestier y l rënd plu uman. Na interazion da maniera vën nce respunduda cun maniera. Sambën che l ie nce for ino ndesfideda, coche canche la jënt ie stresseda o melcuntënta. Te de tei mumënc cëli de resté calma y de respuender a na maniera prufesciunela. Gheneda, respet y cumprenscion possa fé na gran defrënza per manejé uni situazion.

Vosc mestier univa plu da giut udù coche plutosc masculin. Co udëis'a Vo Vosta pert?
Ntlëuta fova i sciaferes dla curieres dantaldut ëi. Al didancuei iel per fertuna nia plu nsci. Ne me é mei lascià sprigulé. L mestier ie autonom y cun truepa respunsabltà, chël me à for sapù bel. Tl medemo mumënt portel cun sé ndesfidedes fisiches y menteles, per ejëmpl turnus lonc o situazions de trafich stressantes. Cun l'esperienza mperen a se deriejer bën.

Cie uel pa dì respet per Vo persunalmënter, tl lëur y tla vita da uni di?
L respet se mostra per mé tla vita da uni di, dantaldut tla pitla cosses : coche n rejona un cun l auter, sce n mantën gheneda y sce n se prova a capì l'autra persones. Uni passajier porta cun sé na si storia. Sce n se rënd cont de chësc, ie dut scialdi plu saurì. L respet ne n'ie nia na teoria, ma n prinzip mpurtant che ie vive uni di.

kt/tk