Ai 5 de setëmber 2025 ie unida tenida la 24ejima garejeda dla firmes dl Südtirol a Egna, cun n record de 2.850 partezipanc da 215 firmes. 

Chësta manifestazion, partner dla campania RESPECT, à ulù promuever l valor dl respet l'un cun l auter nce tl sport y tl lëur de scuadra. 

Dan pië via à i partezipanc abù n menut de chiet, per mandé deberieda n messaje de respet y solidarità. 

Dala 19.30 à scumencià la garejeda de 5 km, cun categuries per ëiles, ëi y scuadres mescededes. Nce na scuadra dla Provinzia de Bulsan à fat pea pra la garejeda. 

La garejeda dla firmes ie al didancuei una dla majera manifestazions sportives dl Südtirol y desmostra che sport, spirt de scuadra y respet possa jì a una.